Բայդենը 20 անգամ ավելի շատ գաղտնի փաստաթղթեր է պահում, քան ես․ Թրամփ

ԱՄՆ նախկին նախագահ Դոնալդ Թրամփը մեղադրել է ԱՄՆ նախագահ Ջո Բայդենին գաղտնի փաստաթղթերի արկղեր պահելու մեջ, որոնց թիվը 20 անգամ գերազանցում է այն տուփերի քանակը, որոնք հայտնաբերվել են Թրամփի Մար-ա-Լագոյի նստավայրում (Ֆլորիդայի նահանգ)։ Հանրապետականը ռադիոհաղորդավար Հյու Հյուիթի հետ իր հարցազրույցի տեսագրությունը տեղադրել է  իր կայքում։

«Դուք գիտեի՞ք, որ Բայդենը 20 անգամ ավելի շատ արկղեր ունի, քան ես։ Դուք գիտեի՞ք, որ նա գաղտնի տեղեկություն է պահում այն ժամանակներից, երբ սենատոր էր»,- ասել է Թրամփը՝ հավաստիացնելով, որ Բայդենը գողացել է փաստաթղթեր։ «Այն, ինչ նա արել է, հանցագործություն է»,- համոզված է նախկին նախագահը։

Հիշեցնենք՝ հունվարին հայտնի էր դարձել, որ Բայդենի հետ կապված վաշինգտոնյան վերլուծական կենտրոնի շենքում գտել են գաղտնի փաստաթղթերի խմբաքանակ։ Դրանք վերաբերում են այն ժամանակներին, երբ Բայդենը զբաղեցնում էր ԱՄՆ փոխնախագահի պաշտոնը (2009-2017թթ.)։ Սպիտակ տան տվյալներով՝ թղթերը հայտնաբերվել են պետության ղեկավարի փաստաբանների կողմից 2022թ. նոյեմբերին։ Փաստաթղթերը գտնվել են օֆիսում, որը Բայդենն օգտագործել է 2017-2019թթ., այսինքն՝ մինչ այն պահը, երբ հայտարարել է իր թեկնածությունը նախագահական ընտրություններում առաջադրելու մասին։ Ավելի ուշ գաղտնի փաստաթղթեր են գտնվել նաեւ Բայդենի Ուիլմինգտոնի տանը (Դելավերի նահանգ)։ Հունիսին Թրամփին ներկայացվել են մեղադրանքներ գաղտնի փաստաթղթերը ոչ պատշաճ ձեւով պահելու գործով։ Թրամփը իր դեմ մեղադրանքները բնութագրում է որպես զուտ քաղաքական որոշում, որն իրականացնում է ԱՄՆ ներկա վարչակազմը՝ դեմոկրատ Բայդենի գլխավորությամբ։ Գաղտնի փաստաթղթերի գործով նախկին նախագահի դատը նշանակված է 2024թ. մայիսին։