Թրամփի դատավարությունը իշխանության զավթման գործով կսկսվի նախագահական ընտրությունների շեմին

ԱՄՆ նախկին նախագահ Դոնալդ Թրամփի՝ իշխանության զավթման փորձի գործով դատավարությունը կսկսվի 2024 թվականի մարտի 4-ին։ Այս մասին հայտնում է CNN-ը։ 

Թրամփի պաշտպանությունը խնդրել էր հետաձգել լսումները մինչև 2026 թվականը, մինչդեռ մեղադրող կողմը պահանջել է դրանք սկսել ավելի վաղ՝ 2024 թվականի հունվարին։ 

Թրամփի դատավարությունը կսկսվի նախագահական փրայմերիզի կիզակետում, որն անցկացվելու է հունվարից հունիսն ընկած ժամանակահատվածում։ 

Նախկին նախագահի դեմ այժմ քննվում է ևս երեք քրեական գործ՝ բիզնես հաշվետվությունների կեղծում, գաղտնի փաստաթղթերի ապօրինի պահպանում և ընտրությունների արդյունքները կեղծելու փորձ։ 

Թրամփն այժմ հանրապետականների նախագահական արշավի առաջատարն է։ Եթե ​​անգամ նա դատապարտվի, դա չի խանգարի նրան մասնակցել ընտրություններին։