ԱՊՀ երրորդ մարզական խաղերը կանցկացվեն Ադրբեջանի Գյանջա քաղաքում

Ադրբեջանի մեծությամբ երկրորդ քաղաքը՝ Գյանջան (Գանձակ), կհյուրընկալի ԱՊՀ երկրների երրորդ խաղերը։ Այս մասին լրագրողներին ասել է Ադրբեջանի երիտասարդության և սպորտի փոխնախարար Մարիանա Վասիլևան, հայտնում է ՏԱՍՍ-ը։

ԱՊՀ երկրների III խաղերը նախատեսված են 2025 թվականին։ 

«ԱՊՀ երկրների երրորդ խաղերը կանցկացվեն Գյանջա քաղաքում՝ սա Ադրբեջանի մեծությամբ երկրորդ քաղաքն է Բաքվից հետո, այնտեղ նոր ժամանակակից համալիր է կառուցվում։ Մեզ դուր եկավ այն միտքը, որ մրցումներ կարելի է անցկացնել մարզերում։ Ձևաչափը կքննարկվի խորհրդում։ Ցանկացած երկիր շեշտը դնում է ավելի զարգացած սպորտաձևերի վրա, կարծում եմ՝ մենք կենտրոնանալու ենք հիմնական օլիմպիական և բոլոր երկրների ավանդական ոչ օլիմպիական մարզաձևերի վրա»,- ասել է Վասիլևան։

Հիշեցնենք, որ ԱՊՀ II խաղերն այժմ անցկացվում են Բելառուսում։ Մրցույթը կտևի մինչև օգոստոսի 14-ը։