Արևմուտքը դեռ համաձայնության չի եկել Ուկրաինայի ԶՈւ օդաչուների կրառման վերապատրաստման հարցերի շուրջ

Վաշինգտոնը և նրա դաշնակիցները դեռևս չեն կարողացել վերջնական համաձայնության գալ Ուկրաինայի օդաչուների՝ ամերիկյան F-16 կործանիչ-ռմբակոծիչների կիրառման վերապատրաստման հետ կապված հարցերի շուրջ։ Այդ իսկ պատճառով Կիևի կողմից ինքնաթիռների ստացումը հետաձգվել է։ Այս մասին հայտնել է ամերիկյան Politico թերթը։ 

Թեև Դանիան և Նիդեռլանդները գլխավորում են 11 պետություններից կազմված կոալիցիան՝ ի աջակցություն ուկրաինական զինված ուժերի վերապատրաստմանը, դեռ ոչ մի երկիր հրապարակայնորեն չի պարտավորվել Կիևին ինքնաթիռներ տրամադրել:

Կողմերը պետք է որոշեն նաև, թե կոնկրետ որտեղ են վերապատրաստվելու ուկրաինացի օդաչուները։ Տարբերակներից է ամերիկյան Թուսոն քաղաքը (Արիզոնա), սակայն աղբյուրները նշում են, որ «այդ գաղափարը մեծ զարգացում չի ստացել»։ Մեկ այլ ծրագիր ենթադրում է ամերիկացի ռազմական օդաչուներն ուղարկել Եվրոպա՝ ուկրաինացիներին «երկրից դուրս ինչ-որ տեղ» մարզելու համար: 

Նշվում է, որ երկու տարբերակներն էլ բացառված չեն, սակայն վերջնական որոշում դեռ կայացված չէ։