Ուկրաինայի ՀՕՊ համակարգը զգալիորեն ուժեղացվել է. Զելենսկի
Ուկրաինայի հակաօդային պաշտպանության համակարգը զգալիորեն ուժեղացվել է: Այս մասին հայտարարել է նախագահ Վլադիմիր Զելենսկին։
Նրա խոսքով՝ երկրի ղեկավարությունը նման որոշում է կայացրել երկրում ռազմական ու ենթակառուցվածքային օբյեկտների վրա ուժեղացված հարձակումների ֆոնին։
«Մեր հակաօդային պաշտպանության համակարգի ուժեղացում է տեղի ունեցել», - ասել է Զելենսկին իր թելեգրամյան ալիքում։
Նա հավելել է, որ հակաօդային պաշտպանության միջոցները կուղարկվեն այն տարածքներ, որտեղ դրանք առավել անհրաժեշտ են։
Նշենք, որ նախօրեին՝ հուլիսի 25-ին, Վլադիմիր Զելենսկին Մեծ Բրիտանիայի վարչապետ Ռիշի Սունակի հետ հեռախոսազրույցի ժամանակ ասել էր, որ Կիևին անհրաժեշտ են արևմտյան հակաօդային պաշտպանության համակարգերի նոր մատակարարումներ։ Նրա խոսքով՝ համապատասխան քայլերը պետք է շտապ ձեռնարկվեն՝ Ուկրաինայի խոշորագույն քաղաքների հիմնական օբյեկտները պաշտպանելու համար։
Արևմտյան գործընկերների օգնությամբ Ուկրաինան արդեն ունի հակաօդային պաշտպանության IRIS-T, NASAMS, Patriot, SAMP / T-Mamba, HAWK համակարգեր։
