Արցախահայերը կանգնած են ֆիզիկական ոչնչացման իրական սպառնալիքի առջև․ Արցախի նախագահ

Արցախահայերը կանգնած են ֆիզիկական ոչնչացման իրական սպառնալիքի առջև, այս մասին ուղիղ եթերում հայտարարեց Արցախի Հանրապետության նախագահ Արայիկ Հարությունյանը: Նրա խոսքով՝ ստիպված հաշվի են նստում նոյեմբերի 9-ի եռակողմ հայտարարության հետ` հույս ունենալով, որ գոնե դա տևական ժամանակ կապահովի որոշակի կայուն միջավայր:

«Շրջափակման ողջ ընթացքում մենք հույս ենք ունեցել, որ միջազգային հանրության տարբեր դերակատարներ կվերացնեն շրջափակումը, կկանխեն դրա հետագա խորացումը: Մենք լսել ենք միայն բարի խոսքեր, բայց ո՛չ Եռակողմ հայտարարության, ո՛չ ՄԱԿ-ի Արդարադատության միջազգային դատարանի հրամանների, ո՛չ Մարդու իրավունքների եվրոպական դատարանի որոշումների, ո՛չ էլ միջազգային կազմակերպությունների, առանձին պետությունների և այլ դերակատարների կոչերի գործնական կատարում այդպես էլ չտեսանք»,- ասել է նա:
 

Հարությունյանը նշել է, որ Ադրբեջանը երբեք չի ցանկացել իրական երկխոսություն ունենալ Արցախի հետ:

«Որոշումից որոշում, կոչից կոչ Արցախի ժողովրդի վիճակը գնալով բարդացել է, իսկ Ադրբեջանը դարձել է ավելի ու ավելի սանձարձակ, ինչը նշանավորում է միջազգային իրավակարգի հոգեվարքը»,- շեշտել է նա: