Սաուդյան Արաբիան տասնապատկել է Ռուսաստանից էժան մազութի գնումները
2023 թվականի հունիսի արդյունքների համաձայն՝ Սաուդյան Արաբիան օրական միջինը 193 հազար բարել մազութ է գնել Ռուսաստանից, ինչը տասն անգամ ավելի է, քան նախորդ տարի։ Այս մասին հայտնում է Reuters-ը՝ հղում անելով Kpler-ի թրեյդերների ու վերլուծաբանների հաշվարկներին։
Նման մատակարարումներով Սաուդյան Արաբիան ցանկանում է ապահովել էլեկտրաէներգիայի արտադրությունը ամռանը, երբ շոգի պատճառով սպառումը կտրուկ աճում է։ Բացի այդ, զգալի զեղչով գնված ռուսական էժան վառելիքը թույլ է տալիս պահպանել նավթի մատակարարումների ծավալը համաշխարհային շուկայում՝ հաշվի առնելով արդյունահանումը նվազեցնելու սեփական պարտավորությունները։
Ռուսաստանից Սաուդյան Արաբիա մազութի մատակարարումները կտրուկ աճել են այն բանից հետո, երբ ԵՄ-ն էմբարգո է սահմանել ռուսական նավթամթերքի գնման վրա։ 2023 թվականի առաջին վեց ամիսների արդյունքներով երկիրը ձեռք է բերել 2,86 մլն տոննա մազութ, մինչդեռ ամբողջ 2022 թվականի համար գնվել է ընդամենը 1,63 մլն տոննա։
Վերլուծաբանները կարծում են, որ Սաուդյան Արաբիան զգալի օգուտներ է ստանում հակառուսական պատժամիջոցների պատճառով։ Եթե մազութի գնումներ չլինեին, երկիրը կօգտագործեր սեփական վառելիքը, ինչը կհանգեցներ սեփական եկամուտների նվազմանը։ Բացի այդ, մազութի մի մասը վերավաճառվում է ավելի թանկ գնով, իսկ հուլիսի վերջին նման վերավաճառքների թիվը հունիսի համեմատ կարող է կրկնապատկվել։
Մայիսի 21-ին Bloomberg-ը, վկայակոչելով Kpler-ի վերլուծաբանների վիճակագրությունը, հայտնել է, որ Հարավարևելյան Ասիայի երկրների համար ծայրահեղ շոգը առաջացրել է Ռուսաստանից ածուխի, գազի և մազութի մատակարարումների պահանջարկի աճ։ Միևնույն ժամանակ, Չինաստանը և Հնդկաստանը շարունակում են մնալ ռուսական հումքի հիմնական ներկրողները։
Ավելի վաղ հաղորդվում էր, որ Սաուդյան Արաբիան և ԱՄԷ-ն մեծ զեղչերով են գնում ռուսական նավթամթերքը։
