«Վագների» ապստամբության ժամանակ ռուսաստանցիները բանկերից 100 միլիարդ ռուբլի կանխիկ գումար են վերցրել. ԿԲ
Հունիսին Ռուսաստանում աճեց կանխիկի պահանջարկը, ինչը հանգեցրեց բանկերից 500 միլիարդ ռուբլու չափով իրացվելիության արտահոսքի։ Հունիսի 23-25-ին «Վագների» խմբի զինված ապստամբության ժամանակ ՌԴ քաղաքացիները հանեցին 100 միլիարդ ռուբլի կանխիկ գումար՝ համաձայն Ռուսաստանի Բանկի նյութերի, գրում է Kommersant-ը։
Փաստաթղթում նշվում է, որ իրացվելիության կառուցվածքային հավելուրդը հունիսին կրճատվել է 400 մլրդ ռուբլով՝ հասնելով 0,5 տրլն ռուբլու։ Կենտրոնական բանկը պահպանել է 2023 թվականի վերջին իրացվելիության կառուցվածքային հավելուրդի կանխատեսումը 2,5 տրլն-ից 3,1 տրլն ռուբլու միջակայքում։
Շրջանառության մեջ կանխիկ դրամի ծավալի աճը դրամավարկային քաղաքականության վարման հետ կապված խնդիրներ չի առաջացնում, հավելում են Կենտրոնական բանկից։ Կարգավորողը հաշվի է առնում իրացվելիության արտահոսքը բանկերի հետ գործարքներ իրականացնելու պարամետրերը որոշելիս:
Հիշեցնենք, որ հուլիսի 10-ին ՌԴ Կենտրոնական բանկը հայտնել էր, որ «Վագների» ապստամբությունը քիչ ազդեցություն է ունեցել ռուբլու փոխարժեքի վրա, և այս օրերին տատանողականության աճը կարճատև է եղել:
Հունիսի 23-ին «Վագների» խմբի ղեկավար Եվգենի Պրիգոժինը հայտարարեց «արդարության երթ» ընդդեմ Մոսկվայի։ Ռուսական իշխանությունները սա համարել են որպես զինված ապստամբություն։ Իրավիճակը հանգուցալուծվել է հունիսի 24-ի երեկոյան Բելառուսի նախագահ Ալեքսանդր Լուկաշենկոյի մասնակցությամբ բանակցություններից հետո։ Հինգ օր անց՝ հունիսի 29-ին, նախագահ Վլադիմիր Պուտինը Կրեմլում հանդիպում է ունեցել Պրիգոժինի և «Վագների» խմբի հրամանատարների հետ։
