Բլինքենը Ալիևի հետ զրույցում ընդգծել է Լաչինի միջանցքով ազատ տարանցման կարևորությունը․ Պետդեպ
ԱՄՆ պետքարտուղար Էնթոնի Բլինքենը Ադրբեջանի նախագահ Իլհամ Ալիևի հետ հեռախոսազրույցի ժամանակ հայտարարել է Լաչինի միջանցքով ազատ տարանցման անհրաժեշտության մասին, հայտնում է Պետդեպարտամենտը։
«Բլինքենն ընդգծել է Լաչինի միջանցքով առևտրային, հումանիտար և մասնավոր տրանսպորտային միջոցների ազատ տարանցման անհրաժեշտությունը»,- նշվում է ԱՄՆ արտաքին գործերի նախարարության կայքում տեղադրված հաղորդագրության մեջ։
Նշվում է, որ զրույցի ընթացքում պետքարտուղարը աջակցություն է հայտնել Հայաստանի և Ադրբեջանի միջև խաղաղ կարգավորման բանակցություններին։
Երեքշաբթի ավելի վաղ Ադրբեջանի պետական սահմանային ծառայությունը հայտարարել էր Լաչինի անցակետի աշխատանքի ժամանակավոր դադարեցման մասին՝ կապված «մաքսանենգության փաստերի հետ»։
Նույն օրը Բլինքենը հեռախոսազրույց է ունեցել ՀՀ վարչապետ Նիկոլ Փաշինյանի հետ։ Զրույցի ընթացքում Փաշինյանը նշել է Լեռնային Ղարաբաղում հումանիտար ճգնաժամի հաղթահարման անհրաժեշտությունը, որն առաջացել է Ադրբեջանի կողմից Լաչինի միջանցքի արգելափակման հետևանքով։
Ադրբեջանը սահմանային անցակետ է ստեղծել Լաչինի ճանապարհին 2023 թվականի ապրիլի 23-ին։
2022 թվականի դեկտեմբերի 12-ին ադրբեջանական կողմը փակել է Ստեփանակերտ-Գորիս ավտոճանապարհը (ռուս խաղաղապահների հսկողության տակ գտնվող Լաչինի միջանցքը)։ Սա Հայաստանը և Լեռնային Ղարաբաղը կապող միակ ճանապարհն է։ Հայաստանի իշխանությունները բազմիցս բարձրացրել են Լաչինի միջանցքի ապաշրջափակման անհրաժեշտության հարցը։
