ՏԵՍԱՆՅՈՒԹ. Մոտոցիկլավարի բացված ուսապարկից ճանապարհին ավելի քան 50.000 դոլար է թափվել. Ֆիլիպիններ

Ֆիլիպինների Սեբու քաղաքի մայրուղիներից մեկով մոտոցիկլետով սլացող տղամարդու՝ Ջոն Մարկ Բարիենտոսի ուսապարկից դուրս է թափվել 40.000 ֆունտ ստեռլինգ (ավելի քան 50.000 դոլար). պատճառը եղել է ուսապարկի կոտրված կայծակաճարմանդը, գրում է Daily Mail-ը:

Թղթադրամներն ընկել են ճանապարհին՝ զարմացնելով  երթևեկության մյուս մասնակիցներին: Նրանցից շատերը դուրս են վազել մեքենաներից ու ագահորեն հավաքել գումարը:

Բարիենտոսը, որն աշխատում է առևտրի կենտրոնում էլեկտրոնային դրամապանակի բեռնման կետում, պատմել է, որ իր պայուսակի կոտրված կայծակնաճարմանդը տեսել է, երբ արդեն շատ ուշ է եղել:

«Ես կողային հայելիով տեսա, որ թղթադրամները դուրս են թափվում, ուստի կանգ առա հավաքելու դրանք, բայց մյուսները նույնպես հավաքում էին թղթադրամները։ Հուսով եմ, որ նրանք կվերադարձնեն գումարը, ես փող չունեմ այդ ամենի համար վճարելու համար», - ասել է նա տեղական ռադիոկայանին:

Գումարը հաշվելուց հետո ոստիկանական բաժանմունքում ասել են, որ գումարից մոտ 14.000 ֆունտ պակասում է, չնայած երեք հոգի արդեն վերադարձրել են իրենց վերցրած թղթադրամները:

Սեբու քաղաքի ոստիկանության գնդապետ Իրենեո Դալոգդոգը տեղական լրատվամիջոցներին ասել է, որ ոստիկանությունը հետաքննում է միջադեպը: Նրանք փորձում են բացահայտել ռադիոյով տեսած մյուս մեքենաների տերերին։