ԵՄ-ն ռազմական օգնություն կցուցաբերի Ուկրաինային՝ չխախտելով միության երկրների շահերը

Բրյուսելում գագաթնաժողովի առաջին օրվա արդյունքներով Եվրամիության (ԵՄ) երկրների ղեկավարները հանդես են եկել Ուկրաինային ռազմական աջակցությունը շարունակելու օգտին։ Նրանց վերջնական հայտարարության մեջ պարզաբանվում է, որ տրամադրվող օգնությունը չպետք է վնասի առանձին եվրոպական երկրների անվտանգությանն ու պաշտպանությանը։ 

ԵՄ-ն ամփոփել է, որ իրենք պատրաստ են կայուն ռազմական աջակցություն ցուցաբերել Ուկրաինային «այնքան ժամանակ, որքան կպահանջվի»: 

«Շեշտվում է անդամ պետությունների շարունակական ջանքերի կարևորությունը՝ նպաստելու Ուկրաինայի հրատապ ռազմական և պաշտպանական կարիքների բավարարմանը առանց վնասելու առանձին անդամ պետությունների անվտանգության և պաշտպանական քաղաքականության առանձնահատկությունները և հաշվի առնելով բոլոր անդամ պետությունների անվտանգության և պաշտպանական շահերը»,- ասված է մամուլի հաղորդագրության մեջ։

Համաշխարհային տնտեսության Կիլի ինստիտուտի տվյալներով՝ 2022 թվականի փետրվարի 24-ից դաշնակիցները մոտ 170 միլիարդ եվրո են ուղարկել Ուկրաինային օգնելու համար, հատկացված միջոցների կեսը ֆինանսական օգնություն է, մոտ 40 տոկոսը՝ ռազմական։ Եվրոպական դիվանագիտության ղեկավար Ժոզեպ Բորելը այս շաբաթ առաջարկեց վերաձեւակերպել Խաղաղության եվրոպական հիմնադրամը, որը, ի թիվս այլ բաների, ֆինանսավորում է Ուկրաինայի զինված ուժերի մատակարարումները՝ ավելի մեծ արդյունավետության համար: Նրա կարծիքով, Կիևին ռազմական օգնությունը պետք է երկարաժամկետ լինի։