Հունգարիան հետաձգել է Շվեդիայի՝ ՆԱՏՕ-ին անդամակցելու քվեարկությունը երկրի խորհրդարանում

Հունգարիայի խորհրդարանը հետաձգել է ՆԱՏՕ-ին անդամակցելու Շվեդիայի հայտի վավերացման քվեարկությունը, չորեքշաբթի հաղորդում է Associated Press (AP) գործակալությունը: 

Ընդդիմադիր «Դեմոկրատական ​​կոալիցիա» կուսակցությունը հայտարարել է, որ իշխող «Ֆիդես» կուսակցությունը հարցը քվեարկության չի դնի հաջորդ շաբաթ, երբ տեղի կունենա խորհրդարանի գարնանային նստաշրջանի եզրափակիչ մասը։ 

Միաժամանակ AP-ն չի հստակեցնում, թե երբ կարող է տեղի ունենալ քվեարկություն այս թեմայով։ 

Թուրքիան և Հունգարիան ՆԱՏՕ-ի երկու երկրներ են, որոնք դեռ չեն վավերացրել Ստոկհոլմի անդամակցությունը դաշինքին։ Մասնավորապես, Անկարան քննադատում է Շվեդիայի իշխանություններին քրդական խմբավորումների դեմ պայքարում անբավարար համագործակցության համար, որոնց Թուրքիան ահաբեկչական է համարում։ 

Բուդապեշտը ավելի վաղ հայտարարել էր, որ աջակցում է ՆԱՏՕ-ին անդամակցելու Շվեդիայի ցանկությանը։ Միաժամանակ Հունգարիայի կառավարությունը շվեդ քաղաքական գործիչներին մեղադրել է Հունգարիայում քաղաքական համակարգի վիճակի մասին ոչ հավաստի հայտարարություններ տարածելու մեջ։ 

Ավելի վաղ Հունգարիայի խորհրդարանը հետաձգել էր ՆԱՏՕ-ին անդամակցելու Ֆինլանդիայի հայտի վավերացումը, սակայն արագ հավանության էր արժանացրել այն, երբ Թուրքիան որոշեց թույլտվություն տալ Հելսինկիին։ Ապրիլի սկզբին Ֆինլանդիան պաշտոնապես միացավ դաշինքին։ 

Չորեքշաբթի ավելի վաղ հաղորդվել էր, որ Թուրքիայի, Շվեդիայի և Ֆինլանդիայի կառավարության պաշտոնյաները հուլիսի 6-ին հանդիպելու են՝ փորձելով վերացնել Ստոկհոլմի՝ ՆԱՏՕ մտնելու խոչընդոտները: