ԱՄՆ-ն կապ չունի Ռուսաստանում տեղի ունեցածի հետ․ Բայդեն

ԱՄՆ նախագահ Ջո Բայդենը երկուշաբթի հայտարարել է, որ Վաշինգտոնը և նրա դաշնակիցները ներգրավված չեն Ռուսաստանում «Վագների» խմբի հետ կապված իրավիճակում։ 

«Մենք հասկացրել ենք, որ դրանում ներգրավված չենք, մենք կապ չունենք այս իրավիճակի հետ, դրանք ներքին ռուսական իրադարձություններ են»,- ասել է Բայդենը՝ ելույթ ունենալով Սպիտակ տանը։ 

Նա հավելել է, որ իրավիճակը քննարկել է «հիմնական դաշնակիցների» հետ։ Նրանք, ըստ Բայդենի, «համաձայնել են, որ չպետք է հիմք տան Ռուսաստանին՝ կատարվածի մեջ մեղադրելու Արևմուտքին և ՆԱՏՕ-ին»։ 

Բացի այդ, ԱՄՆ նախագահը հավելել է, որ հենց «Վագների» մասնակցությամբ իրադարձությունները սկսեցին զարգանալ Ռուսաստանում, նա ազգային անվտանգության թիմին հանձնարարեց «ուշադրությամբ հետևել իրավիճակին (...) և պատրաստվել տարբեր սցենարների»։ 

Բացի այդ, Բայդենն ասել է, որ ԱՄՆ-ն կշարունակի աջակցել Ուկրաինային «անկախ նրանից, թե ինչ կլինի Ռուսաստանում»։