Կասկադյորական վթար՝ «Գլադիատորի» սիքվելի նկարահանումների ժամանակ․ կան տուժածներ

Մարոկկոյում «Գլադիատորի» սիքվելը նկարահանող անձնակազմի մի քանի անդամներ վիրավորվել են նկարահանման հրապարակում կասկադյորական վթարի հետևանքով, գրում է BBC-ն։

Ֆիլմի պրոդյուսերական կազմը Paramount Pictures-ը հայտնել է, որ տուժածների կյանքին վտանգ չի սպառնում, իսկ վնասվածքները ստացվել են պլանավորված կասկադյորական կադրերը նկարահանելիս: 

«Անձնակազմի անդամները գտնվում են կայուն վիճակում և շարունակում են բուժում ստանալ», նշվում է հաղորդագրության մեջ։ 

Այս շաբաթվա սկզբին The Sun-ը հայտնել էր, որ պայթյուն է եղել, և վեց մարդ տեղափոխվել է հիվանդանոց: 

«Սարսափելի էր. հսկայական կրակե գունդն իր ճանապարհին որսացել էր անձնակազմի մի քանի անդամների: Նկարահանումների տարիների ընթացքում ես երբեք այսքան սարսափելի վթար չեմ տեսել», - թերթին ասել է աղբյուրը: 

Հայտարարության մեջ Paramount Pictures-ի ներկայացուցիչն ասել է. «Անվտանգության և ամբողջական բժշկական ծառայությունների թիմերը տեղում կարողացել են արագ գործել, որպեսզի տուժածներն անմիջապես ստանան անհրաժեշտ օգնություն»: