Ողջունում ենք Ալիևի վերջին հայտարարությունները համաներման հարցը քննարկելու մասին. պետդեպ

Միացյալ Նահանգները բարձր է գնահատել վարչապետ Փաշինյանի հավատարմությունը խաղաղությանը, և ողջունել է նախագահ Ալիևի վերջին հայտարարությունները համաներման հարցը քննարկելու մասին։ Այս մասին ասվում է պետդեպի խոսնակ Մեթյու Միլլերի տարածած հայտարարության մեջ։

«Ուրախ ենք տեսնել, որ  Հայաստանի և Ադրբեջանի միջև բանակցությունները շարունակվել են։ Ինչպես ասել է պետքարտուղար Բլինքենը՝ Հարավային Կովկասում հնարավոր է հասնել խաղաղության։ Վերջերս մենք բարձր ենք գնահատել վարչապետ Փաշինյանի հավատարմությունը խաղաղությանը, և մենք ողջունում ենք նախագահ Ալիևի վերջին հայտարարությունները համաներման հարցը քննարկելու մասին»,- նշել է Միլլերը:

Նշենք, որ Ալիևը վերջերս հայտարարություն էր տարածել և Լեռնային Ղարաբաղի իշխանություններից պահանջել էր ցրել խորհրդարանը: Նա բոլոր պաշտոնյաներին կոչ էր արել հրաժարվել պաշտոններից՝ անվանելով դա «միակ ճանապարհը, որով նրանք կարող են համաներում ստանալ»։

Հիշեցնենք՝ պետքարտուղարության խոսնակի հայտարարության մեջ ասվում է նաև, որ հուսով են, որ Քիշնևում Հայաստանի և Ադրբեջանի ղեկավարների հանդիպումը կլինի կառուցողական քայլ՝ կարգավորելու այս հարցերը բանակցային սեղանին և ոչ թե բռնության միջոցով։