Առաջիկա ամիսներին հայկական արբանյակի կառավարումը կիրականացվի ՀՀ տարածքից. Խաչատրյան
Հայաստանն ամբողջությամբ ապահովված է հայկական արբանյակի կառավարումը ՀՀ տարածքից իրականացնելու համար անհրաժեշտ տեխնիկայով։ Այսօր ԱԺ-ում 2022թ–ի բյուջեի կատարողականի քննարկման ժամանակ ասել է ԲՏԱ նախարար Ռոբերտ Խաչատրյանը։
Կառավարումն իրականացնելու համար հարկավոր է կառավարման կենտրոն ու ընդունիչ կայան ունենալ: Նրա խոսքով` դրանցից առաջինն արդեն լիարժեք կահավորված է, բայց պաշտոնապես դեռ չի բացվել։
«Մենք բացման պաշտոնական արարողություն ուզում ենք անել, երբ ամբողջությամբ և՛ կառավարման կենտրոնը կլինի, և՛ ընդունիչ կայանը։ Դրա համար հիմա շատ չի շրջանառում այդ նորությունը, որ կառավարման կենտրոնն ամբողջությամբ կահավորված է։ Սպասում ենք մոտակա ամիսների ընթացքում, որ նաև ընդունիչ կայանը ստանանք։ Ամեն ինչ պատրաստ է, մեր գործընկերների մոտ է, հիմա այդ թղթաբանական աշխատանքներն են արվում, որպեսզի բեռնափոխադրումն արվի։ Դրանից հետո արդեն ամբողջությամբ կահավորված կլինի»,– նշել է Խաչատրյանը։
Արբանյակի կառավարումն ամբողջությամբ Հայաստան տեղափոխելու համար տեխնիկական ապահովությունից բացի, իրականացվում են նաև կադրերի վերապատրաստումներ։
ԱԺ «Հայաստան» խմբակցության պատգամավոր Արթուր Խաչատրյանը հետաքրքրվեց` որքանով է արդարացվել հայկական արբանյակի վրա կատարված ծախսը։
«Ես կածում եմ, որ մեկ տարվա մեջ ասել, որ այդ ներդրումն արդարացված է, կամ այդ ներդրումն ամբողջությամբ մեն ք հետ կբերենք, իրատեսական չէ»,- ասել է ԲՏԱ նախարարը։
Հիշեցնենք, որ «Urdaneta» արբանյակը Հայաստանի համար ստեղծել է իսպանական «Satlantis» ընկերությունը։ Գործարկումը կայացել է 2022 թվականի մայիսի վերջին, որից հետո այն վերանվանվել է «ArmSat-1»։
