Իրանը հերքել է Դոնալդ Թրամփի հայտարարությունը սպասվող համաձայնագրի մասին

Իրանը հերքել է ԱՄՆ նախագահ Դոնալդ Թրամփի հայտարարությունն այն մասին, թե Վաշինգտոնի և Թեհրանի միջև խաղաղության համաձայնագիրը կստորագրվի այսօր, հայտնում է CNN-ը։

Իսլամական հեղափոխության պահապանների կորպուսը (ԻՀՊԿ) մերժել է այդ պնդումները և քննադատության ենթարկել Թրամփի «անսովոր համառությունը»՝ փաստաթուղթը հենց այս օրը ստորագրելու հարցում։ Այս հայտարարությունը հնչել է այն բանից հետո, երբ իրանցի բանակցողները բացահայտ նշել են, որ հուշագրի տեքստը դեռևս վերջնականապես համաձայնեցված չէ, և կիրակի օրը դրա ստորագրումը բացառվում է։

Միևնույն ժամանակ, Իրանում արդեն մեկնարկել են բողոքի ցույցեր՝ ԱՄՆ-ի հետ հնարավոր համաձայնագրի կնքման դեմ։ Մեշհեդ քաղաքում ԱԳՆ շենքի մոտ հավաքված ցուցարարները վանկարկել են երկրի արտաքին գործերի նախարար Աբբաս Արաղչիի դեմ ուղղված կարգախոսներ։

Իրանական Fars գործակալության տարածած տեսանյութում երևում են սև հագուստով կանայք, որոնք վանկարկում են. «Մահ անպատիվ Արաղչիին»։ Հավաքվածները համոզված են, որ նախապատրաստվող համաձայնագիրը Իրանի համար անընդունելի զիջում է։