Իրանը ձեռնարկել է աննախադեպ անվտանգության քայլեր

Վերջին շաբաթներին Իրանը խստացրել է Իսֆահանում գտնվող բարձր հարստացված ուրանի պահեստի պաշտպանությունը։

CNN-ի աղբյուրների փոխանցմամբ՝ պահեստ տանող ստորգետնյա թունելները փլուզվել են, իսկ մուտքերը՝ ականապատվել։

Աղբյուրների խոսքով՝ այժմ ուրանի պաշարներին հասնելը դարձել է զգալիորեն ավելի բարդ և վտանգավոր, այդ թվում՝ հենց իրանցիների համար։ Դրա համար անհրաժեշտ կլինի ծանր տեխնիկա և ականազերծման աշխատանքներ։

Իրանից ուրանի պաշարների դուրսբերումը Վաշինգտոնի հիմնական պահանջներից մեկն է Թեհրանի նկատմամբ։ Թրամփի վարչակազմի ներկայացուցիչը հայտարարել էր, որ կողմերը մոտենում են համաձայնության, որի համաձայն Իրանը պետք է ԱՄՆ-ին փոխանցի հարստացված ուրանը։

Ամերիկացի պաշտոնյաների տվյալներով՝ Իրանը ունի մոտ 440 կիլոգրամ բարձր հարստացված ուրան, որի մեծ մասը պահվում է Իսֆահանի ստորգետնյա թունելներում։ Ուրանի հարստացման մակարդակը կազմում է 60%, մինչդեռ միջուկային զենքի ստեղծման համար այն պետք է հասնի 90%-ի։

CNN-ի տվյալներով՝ մայիսի կեսերին ԱՄՆ զինված ուժերը պատրաստ էին իրականացնել ուրանի առգրավման գործողություն, սակայն նախագահ Դոնալդ Թրամփը դադարեցրել է այն՝ մտավախության պատճառով, որ դա կարող էր առաջացնել Իրանի կոշտ պատասխանն ու երկարաձգել պատերազմը։