Եվրոպական խոշոր ռազմական նախագծի ապագան հարցականի տակ է

Ֆրանսիան պատրաստվում է լքել Գերմանիայի հետ համատեղ իրականացվող հեռանկարային մարտական տանկերի ստեղծման նախագիծը։

Rheinmetall ընկերության գլխավոր տնօրեն Արմին Պապերգերի խոսքով՝ Ֆրանսիան կարող է դուրս գալ Franco-German Main Ground Combat System (MGCS) հիմնական մարտական տանկի նախագծից։ Նա նշել է, որ վերջնական որոշում դեռևս չի կայացվել, սակայն նման ռիսկը պահպանվում է։

Պապերգերը հայտնել է, որ Ֆրանսիան դիտարկում է ծրագրի բյուջեի էական կրճատման հնարավորությունը՝ ծախսերը նվազեցնելով նախապես նախատեսված ծավալի նույնիսկ կեսից պակաս մակարդակի։

Նրա խոսքով՝ նախագծին մասնակցող Rheinmetall, KNDS և Thales ընկերությունները ծրագրի մեկնարկից ի վեր ստացել են ընդամենը 25 միլիոն եվրոյի ֆինանսավորում։

2017 թվականին մեկնարկած MGCS ծրագիրը նախատեսված էր գերմանական Leopard 2 և ֆրանսիական Leclerc տանկերին փոխարինելու համար, սակայն այն բազմիցս բախվել է ուշացումների։

Անորոշությունը խորացել է նաև FCAS համատեղ կործանիչի ծրագրի ձախողումից հետո, ինչը լրացուցիչ բարդություններ է ստեղծել ֆրանս-գերմանական պաշտպանական համագործակցության համար։