Չարլզ III-ի պատվին Լոնդոնում անցկացվել է հանդիսավոր շքերթ

Մեծ Բրիտանիայի թագավոր Չարլզ III-ի պաշտոնական ծննդյան օրվա առթիվ Լոնդոնում անցկացվել է ռազմական շքերթ:

Միապետը թագավորական ընտանիքի անդամների հետ միասին հետևել է արարողությանը հանդիսավոր տրիբունայից։

Բուքինգհեմյան պալատից մինչև Ձիավոր գվարդիայի շքահրապարակ Մել փողոցով անցկացված երթին մասնակցել է ավելի քան 1400 զինծառայող, այդ թվում՝ ավելի քան 400 երաժիշտ։ Արարողությանը ներգրավված է եղել նաև շուրջ 200 ձի։

Մասնակիցների թվում էին նաև բրիտանական գահի ժառանգ արքայազն Ուիլյամը և նրա ընտանիքի անդամները։

Չարլզ III-ը և թագուհի Կամիլան միջոցառմանը ժամանել են բաց «Ասկոտ-լանդո» տեսակի կառքով, որը պատրաստվել է դեռևս թագուհի Վիկտորիայի կառավարման տարիներին։ Նրանց հետևել են թագավորական ընտանիքի մյուս անդամները՝ բաց կառքերով։