ԿԺԴՀ-ն հայտարարել է ապամիջուկայնացման հարցի վերջնական փակման մասին

ԿԺԴՀ-ի ապամիջուկայնացման խնդիրը վերջնականապես ու անդառնալիորեն փակված է, հայտարարել է երկրի արտաքին գործերի նախարարության ներկայացուցիչը

Արտաքին քաղաքական գերատեսչության պաշտոնական հայտարարությունը տարածել է Կորեայի կենտրոնական հեռագրային գործակալությունը, փոխանցում է ՏԱՍՍ-ը։ Փաստաթղթում նշվում է. «ԱՄՆ-ի և նրա արբանյակների անիմաստ հակակորեական հռետորաբանությունը, ինչպես նաև համակարգված սպառնալիքները չեն կարող որևէ ազդեցություն ունենալ միջուկային պետության մեր անդառնալի կարգավիճակի վրա: Ապամիջուկայնացումը մի հարց է, որը վերջնականապես և անդառնալիորեն փակված է»։

ԱԳՆ-ում հատուկ ընդգծել են, որ երկրի՝ որպես միջուկային տերության կարգավիճակը կրում է անդառնալի բնույթ։ Դիվանագետի ձևակերպմամբ՝ որքան էլ ջանան ԱՄՆ-ը, Ճապոնիան և Կորեայի Հանրապետությունը, նրանք երբեք չեն փոխի ԿԺԴՀ-ի ներկայիս կարգավիճակը։

Նաև արձանագրվել է, որ Փհենյանը հետևողականորեն շարունակելու է սեփական միջուկային վահանի ամրապնդումը, ինչը հանրապետությունում դիտարկվում է որպես արտաքին սպառնալիքների զսպման և տարածաշրջանային կայունության ապահովման օրինական գործիք։

«Թշնամական պետությունների կողմից միջուկային զենքի կիրառման ամենօրյա սպառնալիքներին ի պատասխան՝ մշակվում են ռազմատեխնիկական այլընտրանքներ՝ բոլոր հասանելի ուժերի և միջոցների օգտագործմամբ։ Ելնելով հզոր ուժերի հիման վրա անվտանգության ապահովման և խաղաղության պաշտպանության սկզբունքներից՝ մեր վճռականությունը հաստատուն է և անսասան. միջուկային զենքով վերահսկողության տակ առնել այն թշնամական պետությունների կողմից բխող միջուկային սպառնալիքը, որոնք ոտնձգություն են կատարում ԿԺԴՀ-ի բացարձակապես անձեռնմխելի ինքնիշխանության և անվտանգության դեմ», - եզրափակել է ԱԳՆ ներկայացուցիչը։