Լուկա Մոդրիչը ԱԱ-2026-ից հետո կավարտի ֆուտբոլիստի կարիերան

Խորվաթիայի հավաքականի և իտալական «Միլանի» կիսապաշտպան Լուկա Մոդրիչը որոշում է կայացրել ԱԱ-2026-ի ավարտից հետո եզրափակել մարզական կարիերան, հայտնում է լրագրող և ինսայդեր Նիկոլո Սկիրան։

Աղբյուրի փոխանցմամբ՝ 40-ամյա ֆուտբոլիստն արդեն իսկ համապատասխան պայմանավորվածություն ունի Մադրիդի «Ռեալի» հետ։ Կարիերան ավարտելուն պես նա աշխատանքի կանցնի «արքայական» ակումբում՝ զբաղեցնելով առաջարկված պաշտոններից մեկը։ Խորվաթ կիսապաշտպանի գործող պայմանագիրը «Միլանի» հետ ուժի մեջ է մինչև այս տարվա հունիսի 30-ը։

Մոդրիչը «Ռեալի» կազմում հանդես է եկել 2012-ից 2025 թվականներին։ Մադրիդյան ակումբի հետ նա 4 անգամ դարձել է Իսպանիայի չեմպիոն և 6 անգամ տիրացել Չեմպիոնների լիգայի գավաթին։ 2018 թվականին նա արժանացել է «Ոսկե գնդակ» մրցանակին՝ դառնալով այդ պատվին արժանացած առաջին խորվաթ ֆուտբոլիստը։ Խորվաթիայի ազգային հավաքականի կազմում կիսապաշտպանը նվաճել է ԱԱ-2018-ի և Ազգերի լիգայի 2022/23 մրցաշրջանի արծաթե մեդալները։

ԱՄՆ-ում, Կանադայում և Մեքսիկայում անցկացվող ԱԱ-2026-ում Խորվաթիայի ընտրանին հանդես է գալիս L խմբում, որտեղ մրցելու է Անգլիայի (հունիսի 17), Պանամայի (հունիսի 24) և Գանայի (հունիսի 28) հավաքականների հետ։