Մեծ Բրիտանիան Լա Մանշում ռուսական ստվերային նավատորմի լցանավ է կալանել

Մեծ Բրիտանիայի վարչապետ Քիր Սթարմերը զինված ուժերին հրամայել է կալանել Ռուսաստանի հետ կապված նավթատար լցանավը, երբ այն փորձել է անցնել Լա Մանշով։

Այս մասին կառավարության ղեկավարը հայտնել է X սոցիալական ցանցի իր օգտահաշվում կատարած գրառման մեջ։

Մեծ Բրիտանիայի վարչապետը նշել է. «Այսօր վաղ առավոտյան ես հանձնարարել եմ մեր Զինված ուժերին կալանել ստվերային նավատորմի նավթատար լցանավը, որը փորձում էր անցնել Լա Մանշով։ Այս հաջողված գործողությունը հերթական հարվածն է հասցնում Ռուսաստանին և հիշեցնում նրանց, ովքեր սնում են Ուկրաինայում Պուտինի պատերազմը, որ մենք թույլ չենք տա իրենց թաքնվել»։