Հայ ֆուտբոլիստը հայտնվել է ՌՊԼ-ի լավագույնների ցուցակում

«ՌՊԼ-ի հերոսներ» մրցանակաբաշխության պաշտոնական կայքում հրապարակվել է Ռուսաստանի Պրեմիեր լիգայի (ՌՊԼ) 2025/26 մրցաշրջանի լավագույն ֆուտբոլիստի կոչման հավակնորդների ցանկը։ Վեց թեկնածուների թվում է նաև «Կրասնոդարի» ավագ, Հայաստանի ազգային հավաքականի կիսապաշտպան Էդուարդ Սպերցյանը։

Գլխավոր մրցանակի համար Սպերցյանի հետ կպայքարեն նաև Ալեքսեյ Բատրակովը («Լոկոմոտիվ»), Մաքսիմ Գլուշենկովը («Զենիթ»), Դմիտրի Վորոբյովը («Լոկոմոտիվ»), Էսեկիել Բարկոն («Սպարտակ») և Կոնստանտին Տյուկավինը («Դինամո»)։

Նշվում է, որ այս ֆուտբոլիստներն ավտոմատ կերպով անցել են «Մրցաշրջանի ֆուտբոլիստ» անվանակարգի երկրորդ փուլ՝ որպես առաջնության ընթացքում ամսվա լավագույն խաղացող ճանաչված մրցանակակիրներ։

Ավելի ուշ երկրորդ փուլ կանցնեն նաև իրենց դիրքերում լավագույն ճանաչված ֆուտբոլիստները՝ լավագույն պաշտպանը, դարպասապահը, կիսապաշտպանը և հարձակվողը։

Դրանից հետո կձևավորվի մրցաշրջանի լավագույն ֆուտբոլիստի մրցանակի հավակնորդների վերջնական ցանկը։