«Փաշինյանն արդեն բացեիբաց խոստովանում է իր հանցավորությունը»․ Րաֆֆի Հովհաննիսյան

105 տարի առաջ այս օրը Սարդարապատում և քույր ճակատներում վճռվեց մեր ճակատագիրը, և մեր ժողովուրդը Մեծ եղեռնից 3 տարի հետո միասնական  կարողացավ թշնամուն կանգնեցնել: Այս մասին այսօր՝ մայիսի 26-ին, մամուլի ասուլիսի ժամանակ հայտարարել է «Ժառանգություն» կուսակցության ղեկավար Րաֆֆի Հովհաննիսյանը:

«5 տարի առաջ մեր ժողովուրդն ունեցավ արժանի վերելք, որը պատասխան էր նախորդ տարիների սխալների և արատների, նախորդ իշխանակարգերի պահվածքի: Ցավոք սրտի, այդ պայքարը, որը պատկանում էր ժողովրդին, սեփականաշնորհվեց, կուսակցականացվեց և դարձավ մի հոգու, մի խմբակի սեփականությունը: Ի վերջո հասկացանք, որ նա ուներ  իշխանություն ունենալու, այն վայելելու և գուցե ինչ-որ ծրագրեր իրագործելու նպատակներ: Բայց, բոլոր դեպքերում, 5 տարի անց ապրում ենք աննախադեպ վայրէջք, մեր պետականությունը կորցնելու իրական հնարավորություն՝ մեր իսկ ձեռքով»,- ասել է Հովհաննիսյանը:

Նրա խոսքով, եթե միասին ինչ-որ բան չփոխենք, ապա կգնանք մեր երկիրը հանձնելու ցեղասպանության:

Հովհաննիսյանը շեշտել է, որ Նիկոլ Փաշինյանն արդեն բացեիբաց խոստովանում է իր հանցավորությունը, որ ինքը գիտակցաբար հանձնում է պետական, ինքնիշխան տարածքներ:

Քաղաքական գործիչը շեշտում է՝ ունենք լավ սպաներ, բայց որևէ մեկը որևէ ձայն չի հանում, պետական կառույցներում աշխատողները նույնպես չեն ընդդիմանում։ 

«Գնում է պետական, ազգային, քաղաքացիական դավաճանություն: Այս վիճակի կրողը, հեղինակը դարձել է ազգային չարիք: Ուզում են Հայաստանը  դարձնել հաշմանդամ, կոնքային պետություն՝ այն հանձնելով զեղասպանող թշնամիներին: Եվ դա անելով՝ տվյալ անձը նույնպես դառնում է հանցակից ցեղասպանողներին»,- հավելել է նա և ասել․

«Պատերազմ է գալու. Խաղաղության պայմանագիր կոչես, թե ինչ, այս մարդը տալու է ամեն  ինչ և բերելու է պատերազմ, իսկ մենք ի՞նչ ենք անում պատերազմի ժամանակ պաշտպանվելու համար: Պետական մարմինները ի՞նչ սթափություն, ի՞նչ կազմակերպվածություն են բերում ժողովրդին՝ մեզ պատրաստելու այդ արհավիրքին»: