Շնորհակալ եմ Պերուի խորհրդարանին ինձ անցանկալի անձ հայտարարելու համար․ Մեքսիկայի նախագահ

Մեքսիկայի նախագահ Անդրես Մանուել Լոպես Օբրադորը շնորհակալություն է հայտնել Պերուի խորհրդարանի հանձնաժողովին, որը կողմ է քվեարկել իրեն պերսոնա նոն գրատա հայտարարելու օգտին: Այդ մասին հատնել է ТАСС - ը։

«Շատ շնորհակալ եմ ինձ պերսոնա նոն գրատա հայտարարելու համար, որովհետև ես անհարմար կզգայի, եթե այդ օրենսդիրները և իշխանությունը պահող տիկինը ինձ մրցանակ հանձնեին կամ ծափահարեին ինձ։ Ես կամաչեի», - ասել է նա մայիսի 23-ին կայացած մամուլի ասուլիսում։

Մեքսիկայի նախագահը հայտարարել է, որ կարևորություն չի տալիս այդ որոշմանը, որովհետև այն արտացոլում է Պերուի փոքրամասնության դիրքորոշումը։

«Նրանք կոռումպացված քաղաքական գործիչներ են, պաշտոնեական դիրքը չարաշահողներ, ծախու լրագրողներ և մտավորականներ, այլ ոչ թե Պերուի ժողովուրդը», - կարծում է նա:

Հիշեցնենք՝ Պերուի Կոնգրեսի Արտաքին հարաբերությունների հանձնաժողովը մայիսի 22-ին քվեարկել է Մեքսիկայի նախագահ Անդրես Մանուել Լոպես Օբրադորին պերսոնա նոն գրատա հայտարարելու օգտին՝ երկրի իշխանությունների վերաբերյալ նրա քննադատական հայտարարությունների պատճառով։ Այժմ նախաձեռնությունը պետք է քննարկվի խորհրդարանի լիագումար նիստում։