Բորելը շփոթել է ռուսական Բելգորոդը Սերբիայի մայրաքաղաք Բելգրադի հետ
Եվրամիության արտաքին գործերի և քաղաքականության գերագույն հանձնակատար Ժոզեպ Բորելը, լրագրողի հարցին պատասխանելու ժամանակ, ռուսական Բելգորոդը շփոթել է սերբական Բելգրադի հետ, այս մասին գրում է ՏԱՍՍ-ը։
Լրագրողը հարց է ուղղել Բորելին՝ կապված Ռուսաստանի Դաշնության Բելգորոդի մարզի վրա ուկրաինական կողմի հարձակումների հետ։ Սակայն Բորելը ռուսական մարզկենտրոնը շփոթել է Սերբիայի մայրաքաղաքի հետ և ասել․
«Իսկ ի՞նչ է կատարվում Բելգրադում. ես չեմ կարող որևէ կերպ մեկնաբանել այն, ինչ կատարվում է»։
Այստեղ միջամտել է նրա օգնականը, որը բացատրել է, որ խոսքը ռուսական մարզի մասին է, այլ ոչ թե Սերբիայի մայրաքաղաքի, նրանք մի քանի րոպե զրուցել են և Բորելը կրկին ասել է, որ տեղեկություն չունի, թե ինչ է կատարվում Բելգորոդում։
Հիշեցնենք, որ վերջերս ուկրաինական դիվերսիոն-հետախուզական խումբը ներթափանցել էր Բելգորոդ:
