Թուրքիայում իշխող և ընդդիմադիր կուսակցությունների անդամների միջև ծեծկռտուք է եղել
Թուրքիայում գլխավոր ընդդիմադիր ուժ համարվող քեմալական «Ժողովրդահանրապետական» կուսակցության (ԺՀԿ-CHP) և Թուրքիայում իշխող «Արդարություն և զարգացում» կուսակցության (ԱԶԿ-AKP) անդամների միջև ծեծկռտուք է տեղի ունեցել: Տեղեկությունը հայտնում է Ermenihaber.am-ը։
Դեպքը եղել է Թուրքիայի հարավային Գազիանթեփ քաղաքի Ֆեվզի Չաքմաք փողոցում, երբ երկու կուսակցությունների անդամներն իրականցրել են նախընտրական աշխատանքներ:
Թուրքական աղբյուրի հաղորդմամբ՝ ոստիկանության միջամտության հետևանքով մարմնական վնասվածք է ստացել 3 անձ, որոնք հոսպիտալացվել են։
Գազիանթեփի բնակիչ, պատգամավորի ԺՀԿ թեկնածու, փաստաբան Հասան Օզթուրքմենը դեպքը որակել է որպես ԱԶԿ-ականների հարձակում նախընտրական բուկլետ բաժանող ԺՀԿ անդամ երիտասարդների վրա:
Օզթուրքմենը պնդել է նաև, որ 3 վիրավորներից մեկը՝ ԺՀԿ երիտասարդական թևի ղեկավարը, հիվանդանոց է տեղափոխվել ոստիկանական մահակով հարված ստանալուց հետո:
