Իսրայելը Հունաստանին կմատակարարի Orbiter 3 ԱԹՍ-ներ

Իսրայելական Aeronautics Defense Systems Ltd ընկերությունը Հունաստանին կմատակարարի Orbiter III անօդաչու թռչող սարքեր՝ Աթենքի կողմից իսրայելական Spike հակատանկային կառավարվող հրթիռների (ATGM) գնման համար 404 միլիոն դոլար արժողությամբ պայմանագրի շրջանակներում: Այս մասին երեքշաբթի հայտնում է Defense News-ը։ 

Ըստ Aeronautics-ի՝ «երբ Orbiter III-ը հայտնաբերում, ճանաչում և նույնականացնում է թիրախը, օդից, ծովից կամ ցամաքից արձակված Spike հրթիռները կարողանում են արագ հարվածել թիրախին»: 

Պայմանագրի պայմանների համաձայն՝ Հունաստանը կստանա տասնյակ նման անօդաչու թռչող սարքեր։ Orbiter III-ը կարող է օդում մնալ մինչև վեց ժամ, դրա օգտակար բեռնվածությունը կազմում է 32 կգ, իսկ անօդաչու սարքի վրա հնարավոր է տեղադրել տարբեր սարքավորումներ։ Այն կարող է օգտագործվել հսկողության և հետախուզության համար, այդ թվում՝ դժվար եղանակային պայմաններում, GPS ազդանշանի բացակայության դեպքում։