Փաստաթղթերի արտահոսքը վտանգ է ներկայացնում ԱՄՆ ազգային անվտանգության համար․ Պենտագոն
Ուկրաինական պատերազմի մասին բազմաթիվ խիստ գաղտնի փաստաթղթերի առցանց արտահոսքը «շատ լուրջ» վտանգ է ներկայացնում ազգային անվտանգության համար, և բարձրաստիճան ղեկավարներն արագ քայլեր են ձեռնարկում վնասը մեղմելու համար, երկուշաբթի ասել է Պենտագոնի բարձրաստիճան ներկայացուցիչը: Այս մասին գրում է U.S.News-ը։
Պաշտպանության նախարարի հանրային կապերի գծով օգնական Քրիս Միգերը լրագրողներին ասել է, որ պաշտպանության նախարար Լլոյդ Օսթինը հինգշաբթի առաջին անգամ տեղեկացել է մի շարք գաղտնի ճեպազրույցների մասին, որոնք մանրամասնում են Ուկրաինայի պատերազմում ԱՄՆ ռազմական գործողությունները, ինչպես նաև այլ երկրների հետախուզական տվյալները:
Քանի որ Օսթինը ծանուցվել է, նա կապվել է դաշնակիցների հետ, անցկացրել է ամենօրյա վնասի գնահատման հանդիպումներ և ստեղծել թիմ՝ ոչ միայն գնահատելու կորցրած տեղեկատվության քանակը, այլև ստուգելու, թե ով ունի հասանելիություն այդ ճեպազրույցներին: Գերատեսչությունը ուշադիր հետևում է, թե «ինչպես է տարածվում այս տեսակի տեղեկատվությունը և ում միջոցով», - ասել է Միգերը՝ միևնույն ժամանակ չնշելով, թե ինչ քայլեր են արդեն ձեռնարկվել խստացնելու վերահսկողությունը։
Փաստաթղթերը պարունակում են գաղտնի տեղեկություններ Ուկրաինայի պատերազմի, ինչպես նաև Չինաստանի և ԱՄՆ-ի դաշնակիցների մասին։ Պաշտոնյաներն ասում են, որ ֆայլերը այնպիսի ձևաչափով են, ինչպիսին լինում են բարձրաստիճան պաշտոնյաներին տրված փաստաթղթերը, գրում է BBC-ն։
Հետաքննություն է սկսվել՝ պարզելու արտահոսքի աղբյուրը։
Փաստաթղթերը, որոնցից մի քանիսը, ըստ որոշ պաշտոնյաների, փոփոխված են, առաջին անգամ հայտնվել են առցանց հարթակներում, ինչպիսիք են Twitter-ը, 4chan-ը և Telegram-ը, ինչպես նաև Minecraft տեսախաղի Discord սերվերում: Ի լրումն ուկրաինական պատերազմի մասին շատ մանրամասն տեղեկատվության, որոշ փաստաթղթերի արտահոսքը, ինչպես ասում են, լույս է սփռում ԱՄՆ դաշնակիցների վերաբերյալ գաղտնի ճեպազրույցի նյութերի վրա:
Հաղորդվում է, որ փաստաթղթերից որոշները վերաբերել են Մերձավոր Արևելքի, ինչպես նաև Հնդկ-Խաղաղօվկիանոսյան տարածաշրջանի պաշտպանության և անվտանգության խնդիրներին:
