Հայտնել էինք, որ Աշտարակ խոշորացված համայնքի Կարբի գյուղում արտառոց դեպք էր տեղի ունեցել։ Պարեկը փորձել էր բնակարան ներխուժել եւ գողություն կատարել, սակայն բնակիչները կարողացել էին կանխել նրա ներխուժումը։

Ոստիկանությունից Auroranews-ին հայտնել էին, որ երեկ ոստիկանությունը Կարբիից բնակարանային գողության մասին ահազանգ է ստացել, իսկ կեսգիշերին 1987 թվականին ծնված մի տղամարդ, ոստիկանների ուղեկցությամբ, տեղափոխվել է «Աշտարակ» բժշկական կենտրոն։

Այսօր դեպքից որոշ մանրամասներ է հայտնի դարձել hraparak.am-ին: Գյուղացիներից մեկը պատմեց, որ գողության նպատակով իրենց համագյուղացի պարեկը մտել է երկհարկանի տան պատուհանից։ Նա նախապես տեղեկացված է եղել, որ տան անդամները տանը չեն, հարսանիքի են հրավիրված այլ համայնքում։ Պարեկին գողության պահին « բռնել են» հարևանները, իսկ այն, թե նրան երկրորդ հարկից նետել են, սուտ է․

«Մատով չեն կպել, այ բալա, ինքը վախից ցած է թռել, ինքն է թռել ու ոտքը կոտրել, դեռ շտապօգնություն են կանչել, ճանաչում էինք, նրա վատը ոչ մեկս չէր ուզի, բայց որ ինքն է էդ քայլին գնացել․․․․»-պատմեց զրուցակիցը՝ ասելով, որ 36-ամյա երիտասարդը  թեև իրենց գյուղացի է, որպես պարեկ աշխատում է Շիրակի մարզում։

Ոստիկանությունը դեպքի հետ կապված հաղորդում է․ 

«Ոստիկանության Արագածոտնի մարզային վարչության, Աշտարակի բաժնի քրեական հետախուզության և համայնքային ոստիկանության բաժանմունքների ծառայողները, համագործակցելով Հայաստանի քննչական կոմիտեի Արագածոտնի մարզային քննչական վարչության քննիչների հետ, նոր տվյալներ են ձեռք բերել Ռ․ Հայրապետյանի կողմից կատարված գողությունների փաստերով։ Փաստերի ճնշման տակ 9 դրվագ գողություններ է խոստովանել, որոնք կատարել է Կարբի և Օհանավան գյուղերում։ Ռ․ Հ–ն նախկինում աշխատել է ՀՀ պաշտպանության նախարարության Ռազմական ոստիկանությունում»։