«Համեր»-ի վարորդին չե՞ն բռնել. Ոստիկանությունը ճշտել է նրա ինքնությունը. ինչ է հայտնի

ՀՀ ՆԳՆ Ոստիկանությունը տեղեկատվություն է տարածել այսօր Հանրապետության հրապարակում տեղի ունեցած դեպքի առնչությամբ:

«Փետրվարի 10-ին՝ ժամը 23:00-ի սահմաններում, Երևանի կենտրոնում «Համեր» մակնիշի մեքենայի վարորդը կոպիտ կերպով խախտել է ճանապարհային երթևեկության կանոնները, չի ենթարկվել պարեկների օրինական պահանջներին, մեքենան վարել է ոստիկանների և քաղաքացիների ուղղությամբ, նրանց կյանքի և առողջության համար վտանգավոր գործողություններ կատարել: 

Մեքենայի ընթացքը կանգնեցնելու նպատակով գործադրվել է հրազեն անվադողերի ուղղությամբ: Ճշտվել է վարորդի ինքնությունը, ձեռնարկվում են համապատասխան միջոցառումներ: 

Կտրվի լրացուցիչ տեղեկատվություն»,- նշվում է հաղորդագրության մեջ:

Նշենք, որ այսօր միջադեպ է տեղի ունեցել Երևանի կենտրոնում: Պարեկները հետապնդել են «Համեր» մակնիշի մեքենան, որի ընթացքում հնչել են կրակոցներ, պարեկներին հաջողվել է ծակել մեքենայի անիվները։

«Տեսանյութում հրապարակի կենտրոնը հատող «Համմերի» դիմացը կարողանում են կտրել պարեկները, մոտենում են մեքենային, բայց վարորդին չեն կարողանում դուրս բերել։ Մի քանի վայրկյանից մեքենան կարաողանում նորից պարեկներից ազատվել և Հանրապետության հրապարակից շարժվում է Տիգրան Մեծ փողոցի ուղղությամբ։ Ձախ կատարելով դեպի Ագաթանգեղոսի փողոց՝ «Համմերը» մտնում է մոտակա դալանը, և վարորդը, թողնելով մեքենան, փախչում է: Մեքենայի համարանիշը Հանրապետության հրապարակի պարեկների մեքենաների հետ ընդհարումից ընկել էր մայթին»,- գրում է «Հետքը»: