«Գյումրիում թափառող շները հարձակվել են 10 տարեկան թոռնիկիս վրա». Հակոբ Խաչատրյան
Գյումրու բնակիչ Հակոբ Խաչատրյանը նախօրեին լուսանկարներ է տարածել իր էջում՝ կից գրառմամբ.
«Մուշ թաղամասի 9/1 շենքի մոտ թափառող շները հարձակվել են 10 տարեկան թոռնիկիս վրա` պատճառելով մարմնական վնասվածքներ դեմքի և ազդրի շրջանում։ Բարեբախտաբար անցորդներից մեկը հասել է օգնության։ Խոսքս ուղղում եմ քաղաքապետին` ո՞վ է պատասխան տալու այս դեպքի առնչությամբ։ Ո՞ւմ եմ դիմելու»։
Քաղաքացու գրառման տակ ակտիվ քննարկում է ծավալվել:
Օգտատատերից մեկը խորհուրդ է տալիս դատի տալ թե համայնքապետարանին թե քաղաքապետարանին մարդկանց վտանգավոր իրավիճակի մեջ դնելու համար: Մեկ ուրիշն առաջարկում է թափառող շների համար տեղ հատկացնել, կերակրել, պահել ինչպես բոլոր նորմալ երկրներում: Մեկ այլ օգտատեր էլ նշում է, որ մարդիկ տարրական վերաբերմունք չունեն, թե մարդկանց, թե կենդանիների հետ վարվելու: Նախ պետք է բարեգութ լինել սոված, ցրտահարված, ծեծված կենդանիների հանդեպ, որոնց ի դեպ շատերի երեխաներն են ծեծում, նոր կենդանիներից պահանջել հանգստություն։
