ՏԵՍԱՆՅՈՒԹ. «Կատոկ է, աղ ու ավազ չեն լցրել». վարորդները ահազանգում են` մեքենաներ են շրջվել, վթարային իրավիճակ է ճանապարհներին

 Արտաշատ-Երևան ճանապարհատվածի մեծ մասում մաքրման աշխատանքներ կատարված չեն: Այս մասին Auroranews.am-ը ստացել է բազմաթիվ ահազանգեր:

Վարորդները նշվում են, որ այդ ճանապարհահատվածում կան շրջված մեքենաներ, տարբեր հատվածներում` վթարված մեքենաների խմբեր: 

Քաղաքացիներից մեկն ասաց.
«Մինչև Հովտաշեն համայնք աղ ու ավազ լցրել են, դրանից հետո ընդանրապես ոչինչ արված չէ, կատոկ է (մերկասառույց): Իմ դիմացի երկու մեքենաները բախվեցին 3 վթարված ավտոմեքենաներին, իսկ ես մի կերպ կարողացա դուրս գալ վթարային իրավիճակից: Ճանապարհին կար նաև կիսաշրջված ամենագնաց»:

Ահազանգ ենք ստացել նաև Երևան-Արմավիր ճանապարհին առկա անմխիթար վիճակի մասին: Վարորդը նշեց, որ մինչև Արշալույս համայնք ճանապարհին աղ ու ավազ լցված չէ:

Auroranews.am-ը ստացված ահազանգերի մասին տեղեկացրեց  ՀՀ ոստիկանությանը և «Ճանապարհային դեպարտամենտ» հիմնադրամին:

ՀՀ տարածքային կառավարման և ենթակառուցվածքների նախարարության  մամուլի բաժնի հետ կապ հաստատել չհաջողվեց` մաքրման աշխատանքների թերկատարման մասին ահազանգերի վերաբերյալ տեղեկություն ստանալու համար: