Մեսսին պատվի պտույտը կատարել է կեղծ գավաթով. Դի Մարիան պատմել է զավեշտալի դեպքի մասին

 Թուրինի «Յուվենտուսի» և Արգենտինայի հավաքականի կիսապաշտպան Անխել Դի Մարիան զվարճալի դեպք է պատմել Քաթարում կայացած Աշխարհի առաջնությունում թիմի հաղթանակը տոնելու ժամանակ։

«Ես գավաթը ձեռքիս ընտանիքիս հետ լուսանկարվում էի, երբ նկատեցի, որ Լեոն պատվի պտույտ էր անում մեկ այլ գավաթով: Մտածեցի, որ ինձ մոտ կեղծ գավաթն է, բայց կողքիս ՖԻՖԱ-ի երկու ներկայացուցիչ էին կանգնած, ովքեր ասացին, որ ինձ մոտ բնօրինակն է։

Այնուհետև ես գնացի Լեոյի մոտ, և մենք միասին մի լավ ծիծաղեցինք, երբ ես նրան ասացի, որ նա այդ ամենն արել է ոչ օրիգինալ գավաթով»,- Դի Մարիայի խոսքերն է փոխանցում TyC Sports-ը։

Դեկտեմբերի 18-ին աշխարհի առաջնության եզրափակիչում Արգենտինայի հավաքականը հաղթեց Ֆրանսիայի հավաքականին և դարձավ գավաթի նոր սեփականատերը։