Հունաստանը Leopard 2 տանկեր չի տրամադրի Ուկրաինային

Հունաստանի վարչապետ Կիրիակոս Միցոտակիսը Ճապոնիա կատարած այցի ժամանակ Nikkei Asia-ին տված հարցազրույցում ասել է, որ Հունաստանն Ուկրաինային Leopard 2 տանկեր չի մատակարարի։ Վարչապետի խոսքերը երեքշաբթի մեջբերել է հունական onalert.gr լրատվական պորտալը։

«Մենք զգալի ռազմական աջակցություն ենք ցուցաբերել Ուկրաինային, մասնավորապես՝ տրամադրելով զրահապատ հետևակային մեքենաներ, սակայն Leopard 2 տանկերը չենք տա այն պարզ պատճառով, որ դրանք միանգամայն անհրաժեշտ են մեր պաշտպանության համար։ Մենք հասկացրել ենք, որ պատրաստ ենք աջակցել Ուկրաինան, միայն թե` չվնասելով մեր պաշտպանական հնարավորությունները»,- պորտալը մեջբերում է վարչապետի խոսքերը։

Հունվարի 25-ին ԱՄՆ իշխանությունները հայտարարեցին Կիև 31 M1 Abrams տանկ տեղափոխելու մտադրության մասին։ Նույն օրը Գերմանիայի կառավարությունը հաստատեց, որ 14 Leopard 2 տանկ կուղարկի Ուկրաինա և թույլտվություն կտրամադրի այլ երկրներին՝ այդ տեխնիկան վերաարտահանելու համար։