Համլետի մայրը մահացած էր, մեկ տարվա զինծառայող էր. Մարտունու փոխհամայնքապետը՝ հրդեհի հետևանքով զոհված զինծառայողի մասին

 Այսօր Գեղարքունիքի մարզի Ազատ բնակավայրում տեղակայված զորամասում բռնկված հրդեհի հետևանքով մահացած 15 զինծառայողներից է Համլետ Դավթյանը: Նա Մարտունիից էր, միակողմանի ծնողազուրկ: Տեղեկությունը «Փաստինֆո»-ի հետ զրույցում հայտնեց Մարտունի համայնքի ղեկավարի տեղակալ Վահագն Դավթյանը: 
 

«Համլետը Մարտունիից էր, մեկ տարվա զինծառայող, միակողմանի ծնողազուրկ էր: Դպրոցից հետո ծառայության էր անցել ՀՀ ԶՈՒ-ում: Շատ լավ ընտանիքի զավակ էր, անձամբ շփվել եմ, ճանաչում եմ Համլետի ընտանիքին»,- ասաց փոխհամայնքապետը: 

Լուրն ստանալուն պես Մարտունու համայնքապետարանի և զինկոմիսարիատի աշխատակիցները դեպքի մասին տեղյակ են պահել հարազատներին: 

«Նույնիսկ մորգում եմ եղել, ազգականներն եկել են, իրեն ճանաչել են: Շատ դաժան բան է, բոլորի համար ցավում եմ»,- նշեց Դավթյանը: 

Նրա խոսքով՝ Համլետը ընտանիքի միակ արու զավակն էր, երկու քույրերն ամուսնացած են: Հայրը արտագնա աշխատանքով է զբաղվում: 

Հիշեցնենք, որ հրդեհը բռնկվել է հունվարի 19-ին՝ ժամը 01:30-ի սահմաններում, դեռևս չպարզված հանգամանքներում` Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում: 
Բռնկված հրդեհի հետևանքով զոհվել է 15 զինծառայող, 3 զինծառայողի վիճակը գնահատվում է ծանր: