Էբոլայով վարակված ուղևորները կարող են հասնել Թուրքիա և եվրոպական երկրներ․ հետազոտություն

Ճապոնացի գիտնականները զգուշացնում են, որ Էբոլա վիրուսով վարակված մարդիկ Աֆրիկայից միջազգային ավիաչվերթների միջոցով կարող են ընդամենը մեկ ամսվա ընթացքում հասնել աշխարհի խոշոր օդային հանգույցներ։ Հաղորդում են ԶԼՄ–երը: 

Հետազոտության համաձայն՝ ամենաբարձր ռիսկի գոտում են Բելգիան, Ֆրանսիան, Արաբական Միացյալ Էմիրությունները և Թուրքիան։ Գիտնականները վերլուծել են Կոնգոյի Դեմոկրատական Հանրապետությունից և Ուգանդայից իրականացվող ավիաչվերթների ցանցը և հաշվարկել, թե որքան հավանական է, որ 30 օրվա ընթացքում այդ երկրներ հասնի առնվազն մեկ վարակակիր։

Ամենավատ սցենարի դեպքում Էբոլայով վարակված անձի Բելգիա հասնելու հավանականությունը գնահատվում է 92%, Ֆրանսիա՝ 91%, ԱՄԷ՝ 88%, իսկ Թուրքիա՝ 86%։

Հետազոտության հեղինակները նշում են, որ այս տվյալները թույլ են տալիս ժամանակին հետևել համաշխարհային համաճարակաբանական իրավիճակին, սակայն ընդգծում են՝ վիրուսի որևէ երկիր հասնելու վտանգը դեռ չի նշանակում, որ այնտեղ անպայման բռնկում կլինի։

Հետազոտության ընթացքում ուսումնասիրվել են ավելի քան 11 հազար օդանավակայանների, շուրջ 570 հազար ավիաուղիների և 330 միլիոն ուղևորների մասին տվյալներ։