Ղազախստանը առաջին 20 հազար տոննա նավթը կուղարկի Գերմանիա

Ղազախստանը մտադիր է առաջին 20 հազար տոննա նավթը Գերմանիա մատակարարել հունվարին։ Այս մասին չորեքշաբթի լրագրողներին հայտնել է Ղազախստանի էներգետիկայի նախարար Բոլատ Ակչուլակովը, գրում է ТАСС-ը:

«Հիմա առաջին խմբաքանակը՝ 20 հազար տոննա»,- ասել է Ակչուլակովը՝ պատասխանելով հունվարին Գերմանիա նավթի մատակարարումների մասին հարցին։

Նրա խոսքով՝ Գերմանիա նավթի մատակարարումների ծավալը, որը կսկսվի հունվարին, կարող է ավելացվել։ «Ընդհանուր առմամբ տարեկան կարող է լինել մինչև 1,5 մլն տոննա, բայց առավելագույնը, որ մենք կարող էինք անել, տարեկան 6-7 մլն տոննա է»,- պարզաբանել է նախարարը։

Նա նշել է, որ Ղազախստանը սպասում էր Ռուսաստանից պաշտոնական հաստատմանը։ «Մենք սպասում էինք Ռուսաստանի Դաշնության մեր գործընկերների պաշտոնական հաստատմանը, քանի որ անցումը Ռուսաստանով է։ Բայց այստեղ մենք ունենք բանավոր հաստատում ռուսական կողմից, կարծում եմ, որ մեծ խնդիր չի լինի։ Հիմա բավականաչափ հզորություն կա, գլխավորն այն է, որ սպառողները վերցնեն։ Մենք երբեք մեծ խնդիրներ չենք ունեցել Ռուսաստանի Դաշնության հետ՝ պոմպակայման հետ կապված»,- ասել է Ակչուլակովը։