«Պատասխանատվությունը կրում է Ղարաբաղում ապրող հայերի ղեկավարությունը». Լավրով
Ղարաբաղում ռուսական խաղաղապահ կոնտինգենտի զինվորականները շուրջօրյա միջոցներ են ձեռնարկում Լաչինի ճանապարհին իրավիճակը կարգավորելու համար՝ կապեր պահպանելով ներգրավված բոլոր կողմերի հետ։ Այս մասին դեկտեմբերի 23-ին իր ադրբեջանցի գործընկեր Ջեյհուն Բայրամովի հետ կայացած բանակցություններում հայտարարել է ՌԴ ԱԳ նախարար Սերգեյ Լավրովը։
Սակայն, ռուս նախարարը ընդգծել է, որ եթե Բաքուն և Երևանը ցանկանում են հրաժարվել խաղաղապահ առաքելության ծառայություններից, կարող են նստել բանակցությունների սեղանի շուրջ և քննարկել այլ տարբերակներ։ Լավրովի խոսքով, Մոսկվան անում է հնարավոր ամեն ինչ, որպեսզի լուծի, իր խոսքով, Գըզըլբուլագ և Դեմիրլի (Իրական անվանումները` Կաշեն և Դրմբոն) հանքավայրերի շահագործման հետ կապված վեճերը, որոնք գտնվում են խաղաղապահների կողմից վերահսկվող Ղարաբաղի տարածքում։
ՌԴ արտգործնախարարը վստահեցրել է, որ Ռուսաստանը, ինչպես և ոչ ոք, շահագրգռված է Հայաստանի և Ադրբեջանի միջև տեւական, արդար խաղաղությամբ։ Լավրովը Բայրամովին ասել է, որ ադրբեջանական մոնիթորինգային հանձնաժողովի այցի վերաբերյալ կողմերի համաձայնությունը խափանվել է ոչ ռուս խաղաղապահների մեղքով. նրա խոսքով` դրա պատասխանատվությունը կրում է Ղարաբաղում ապրող հայերի ղեկավարությունը:
