ՔՊ–ական պատգամավոր Էդուարդ Աղաջանյանը, ԵԱՀԿ ԽՎ–ում Հայաստանի Ազգային ժողովի պատվիրակության անդամների մամուլի ասուլիսի ժամանակ անդրադառնալով դեկտեմբերի 3–ին որոշ ժամանակ ճանապարհը փակելու խնդրին, նշեց, որ ադրբեջանցիների կողմից Լաչինի միջանցքը փակելը խնդրահարույց է։  

«Այն, ինչ տեղի է ունեցել մի քանի օր առաջ, ինչի արդյունքում դե ֆակտո Լաչինի միջանցքը փակվել է, բնականաբար, խնդրահարույց է։ Կարծում ենք, որ ռուս խաղաղապահների հետ պետք է անենք ամեն ինչ, որ նման բան չկրկնվի»,–ասաց Աղաջանյանը։

Աղաջանյանն ընգծեց, որ 2020 թ. նոյեմբերի 9-ի եռակողմ հայտարարությամբ արձանագրվում է, որ Լաչինի միջանցքը պետք է գործի միայն ռուս խաղաղապահների վերահսկողության ներքո, Հայաստան–Արցախ կապը պետք է առանց խոչընդոտների լինի։ Նա նշեց, որ որևէ խոչընդոտող դետալ անընդունելի է։

Հիշեցնենք` Շուշի-Քարին տակ խաչմերուկի հատվածում քաղաքացիական հագուստներով մի խումբ ադրբեջանցիներ բնապահպանական պատճառաբանությամբ փակել էին Ստեփանակերտ-Գորիս մայրուղին։