Մակրոնը՝ Ռուսաստանի և արևմտյան երկրների մտադրությունների մասին

Ֆրանսիայի նախագահ Էմանուել Մակրոնը կարծում է, որ իր երկիրը և արևմտյան մյուս պետությունները չեն ձգտում Ռուսաստանի ոչնչացմանը։ Ինչպես հաղորդում է ԱՊԱ-ն՝ վկայակոչելով ՏԱՍՍ-ին, այս մասին ֆրանսիացի առաջնորդը հայտարարել է ամերիկյան CBS հեռուստաալիքի լրագրողներին տված հարցազրույցում, որը հրապարակվել է կիրակի օրը։

Մակրոնի խոսքով՝ Մոսկվան իբր «որոշակի վրդովմունք» է զգում և կարծում է, որ արևմտյան երկրները ձգտում են «ոչնչացնել Ռուսաստանը»։ «Չեմ կարծում, որ դա մեր ձգտումն է, մենք երբեք նման ձգտում չենք ունեցել Ֆրանսիայում»,- ասաց նա։ 

«Ավելին, մենք մշակութային և պատմական տեսանկյունից շատ սերտ հարաբերություններ ունենք, և մենք միշտ հարգել ենք Ռուսաստանի ժողովրդին»,- վստահեցրել է նա։ Մակրոնը նաեւ հայտարարել է, որ «շատ երկար խոսակցություններ» է ունեցել ռուսական պետության ղեկավարի հետ։ Ֆրանսիայի նախագահի խոսքով՝ նման խոսակցությունների ժամանակ «հստակ հասկացություն կար, որ ռուսները մեծ պատմություն ունեցող մեծ ժողովուրդ են»։