Ադրբեջանը փորձում է հիմքեր ստեղծել Լաչինի միջանցքի նկատմամբ վերահսկողություն սահմանելու համար․ Մարուքյան

Ադրբեջանը փորձում է հիմքեր ստեղծել Լաչինի միջանցքի նկատմամբ վերահսկողություն սահմանելու համար։ Բաքվի՝ Երևանին ուղղված հերթական մեղադրանքներին անդրադառնալով, «Ազատության» հետ զրույցում հայտարարել է Հայաստանի հատուկ հանձնարարություններով դեսպան Էդմոն Մարուքյանը։

Ադրբեջանի արտգործնախարարությունը երեկ հայտնել էր, թե օգոստոսից Ադրբեջանի և Հայաստանի միջև սահմանին՝ Քելբաջարի և Լաչինի հատվածներում անցած տարի Հայաստանում արտադրված ականներն են հայտնաբերվել», պնդելով, թե այդ ականները վկայում են, որ Հայաստանը Լաչինի միջանցքն «օգտագործել է ապօրինի ռազմական գործունեության համար»՝ «կոպտորեն խախտելով եռակողմ հայտարարության 6-րդ կետը»։

«Ինչի՞ համար է սա արվում, սա արվում է մեկ բանի համար, որ Լաչինի միջանցքի նկատմամբ փորձեն վերահսկողություն սահմանել և հիմա այդ, այսպես կոչված, սոուսն են պատրաստում: Հիմա մենք արձագանքել ենք և մեր միջազգային բոլոր գործընկերներին տեղեկացնում ենք, որ այդ ականները հանվել են նշված վայրերից, այսինքն, Հայաստանի Հանրապետության օկուպացված տարածքներից», - նշել է Մարուքյանը: