Անհրաժեշտ է ավելացնել Ադրբեջանից Եվրոպա գազի մատակարարումները: Ինչպես հաղորդում է Trend-ը՝ թուրքական լրատվամիջոցներին հղումով, այս մասին երեքշաբթի օրը Անթալիայում 12-րդ էներգետիկ գագաթնաժողովի ժամանակ հայտարարել է Գերմանիայի նախկին կանցլեր Գերհարդ Շրյոդերը։ 

Շրյոդերը նշել է, որ պայմանավորվածություն կա Հարավային գազային միջանցքի թողունակությունը երկարաժամկետ հեռանկարում հասցնել մոտ 31 մլրդ խմ-ի, սակայն այդ ներդրումները պահանջում են բոլոր շահագրգիռ կողմերի կամքն ու ջանքերը։ 

«2020 թվականից սկսած մեծ աշխատանք է տարվել Ադրբեջանից Եվրոպա բնական գազ հասցնելու ուղղությամբ։ Գազամուղի թողունակության ավելացումը մեծ նշանակություն ունի Թուրքիայի՝ որպես էներգետիկ հանգույցի դերի ամրապնդման համար»,- ասել է նա։