ՏԵՍԱՆՅՈՒԹ. Ադրբեջանի հետ սահմանին լայնածավալ ցամաքային զորավարժություններ են սկսվել
Իրանը եռօրյա լայնածավալ զորավարժություններ է անցկացնում երկրի հյուսիս-արևմուտքում՝ «Հզոր Իրան» ծածկանունով: Ինչպես գրում է ТАСС-ը՝ այս մասին հայտնել է Իսլամական հեղափոխության պահապանների կորպուսի ցամաքային զորքերի հրամանատար, գեներալ Մոհամմադ Փաքփուրը:
«Հարևան երկրների համար այս զորավարժությունները խաղաղության, բարեկամության և անվտանգությունն ամրապնդելու մտադրության ուղերձ են, թշնամիների համար՝ Իրանի սահմանները պաշտպանելու վճռականության հաստատում»,- հայտարարել է գեներալը։
ԻՀՊԿ-ի ցամաքային զորքերի հրամանատարի տեղակալ Ալի Աքբար Փուրջամշիդիանը նշել է, որ «Ադրբեջանն ու Հայաստանն Իսլամական Հանրապետության համար սպառնալիք չեն, բայց այնտեղ տեղի ունեցող որոշ զարգացումներ վտանգավոր են»:
Նա համոզմունք է հայտնել՝ եթե տարածաշրջանի զինված ուժերը սերտորեն գործակցեն, դիվանագիտության և տարածաշրջանի անվտանգության համար բավարար հիմքեր կարող են ստեղծվել: Նա նաև անընդունելի է համարել արտաքին միջամտությունը տարածաշրջանային հարցերին:
