Ուժեղ կարկուտից երիտասարդ նախրապանը ծանր վնասվածքներ է ստացել

Շիրակի մարզում տեղի է ունեցել ուժեղ կարկտահարություն, որից առավելապես տուժել է Բագրավան համայնքը։

Այս բնակավայրում մոլեգնել է նաև փոթորիկ, ինչի հետևանքով գյուղը մեծ վնասներ է կրել։ «Շիրակ կենտրոն» ՀԿ ղեկավար Վահան Թումասյանը Բագրավանից տեսանյութ և լուսանկարներ է տարածել՝ արձանագրելով, որ այնտեղ իրական աղետ է եղել։ Թումասյանը նաև տեղեկացրել է, որ Բագրավանի երիտասարդ նախրապանը, գտնվելով սարերում, լուրջ վնասվածքներ է ստացել։

«Բագրավանի սարերում երիտասարդ նախրապանին բավականին ծանր վիճակում տեղափոխեցին հիվանդանոց: Սարերում է եղել և ուժեղ կարկտահարությունից բավականին ծանր վնասվածքներ է ստացել... Առողջություն ենք մաղթում և Աստված ենք կանչում, որ շուտ ապաքինվի»։