9620 դիմորդ արդեն ընդունվել է բուհ. անվճար տեղերի մեծ մասը համալրվել է

ՀՀ կրթության, գիտության, մշակույթի և սպորտի նախարար Ժաննա Անդրեասյանի գլխավորությամբ այսօր տեղի է ունեցել հանրապետական ընդունող հանձնաժողովի նիստը:

Նիստի աշխատանքներին մասնակցել են նախարարի տեղակալ Արաքսիա Սվաջյանը, Բարձրագույն կրթության և գիտության նախագահ Սարգիս Հայոցյանը, Գնահատման և թեստավորման կենտրոնի տնօրեն Արմեն Փաշայանը, տեղակալ Կարո Նասիբյանը, ինչպես նաև բուհերի ռեկտորներ ու պրոռեկտորներ։ Օրակարգի հաստատումից հետո հանձնաժողովը քննարկել է ՀՀ բարձրագույն ուսումնական հաստատությունների՝ 2026-2027 ուստարվա՝ ըստ մասնագիտությունների առկա ուսուցմամբ բակալավրի ու անընդհատ և ինտեգրացված կրթական ծրագրերով ընդունելության հիմնական փուլի նախնական, այդ թվում՝ օրենքով սահմանված արտոնություններ ունեցող դիմորդների ցուցանիշները:

ԳԹԿ տնօրեն Արմեն Փաշայանը ներկայացրել է ընդունելության նախնական տվյալները, որոնց համաձայն՝ 2026 թվականի բուհերի ընդունելության համար Կառավարության կողմից տրամադրվել է 12720 տեղ, որից 2133-ը՝ անվճար, 10587-ը՝ վճարովի։ Ուսումնական հաստատություններ է ընդունվել 9620 դիմորդ, որից անվճար հիմունքներով՝ ներառյալ պահուստային և նպատակային տեղերը՝ 1875 դիմորդ, իսկ վճարովի հիմունքով՝ 7799 դիմորդ։

Արդեն երկրորդ տարին անընդմեջ, Տավուշի մարզում կազմակերպվել են ընդունելության լրացուցիչ քննություններ այն դիմորդների համար, ում ուսուցումը 10-րդ, 11-րդ և 12-րդ դասարաններում ամբողջությամբ իրականացվել է նոր չափորոշիչներով։ Այս դիմորդները, բացի ընդունելության միասնական քննություններից, նոր չափորոշչի շրջանակում քննություն հանձնելու լրացուցիչ հնարավորություն են ունեցել, և նրանց ցուցաբերած քննական արդյունքները, ըստ ԳԹԿ-ի, նախորդ քննությունների համեմատ բարելավվել են։

Հանրապետական ընդունող հանձնաժողովը քննարկել ու հաստատել է բուհերի 2026-2027 ուսումնական տարվա՝ բակալավրի կրթական ծրագրերով ընդունելության մրցույթի հիմնական փուլի արդյունքները՝ ըստ բուհերի և մասնագիտությունների: Բացի այդ, քննարկվել ու հաստատվել են ազգային փոքրամասնություններին հատկացված արտոնյալ տեղերի մրցույթի արդյունքները։ Նշվել է, որ բուհերի ընդունելության արդյունքները հրապարակվելու են վաղը՝ հուլիսի 18-ին:

Ծանոթանալով ընդհանուր տվյալներին՝ նախարար Ժաննա Անդրեասյանն անդրադարձել է միասնական քննությունների կազմակերպմանը, արդյունքների ամփոփման ու հրապարակման ժամկետներին։ Նա նաև նշել է, որ զուգահեռաբար պետք է դիտարկվի ընդունելության քննությունների էլեկտրոնային եղանակով անցկացման հնարավորությունը՝ հաշվի առնելով, որ հետագայում բուհերի դերն ընդունելության գործընթացում ընդլայնվելու է, և բուհերից շատերն արդեն ունեն թվային հարթակների կիրառման արդյունավետ փորձ։ Նիստում քննարկվել են նաև թափուր տեղերի վերաբաշխմանը, ինչպես նաև ընդունելության գործընթացին առնչվող մի շարք այլ հարցեր։