Պաշտոնյաներ կան, որ բարձրագույն կրթություն չունեն, բայց միլիոններ են վաստակում. Թագուհի Թովմասյան

Համայնքներում ի թիվս այլ հանդիպումների, շփվեցի մի շարք ուսուցիչների հետ: Մարդիկ տարակուսած են. ինչու է երկրի վարչապետը իրենց կրթության որակը կասկածի տակ դնում: Այս մասին ֆեյսբուքյան իր էջում գրել է ԱԺ պատգամավոր Թագուհի Թովմասյանը: 

«Ուսուցիչները մեծ ոգևորությամբ ու հպարտությամբ պատմում էին, թե ինչպես են իրենց կրթած սերունդներն այսօր խիզախորեն կանգնած պահպանում հայրենիքի սահմանները և նշում, որ մինչև վերջ շարունակելու են կատարել իրենց հայրենանվեր գործը՝ կրթելով սահմանամերձ համայնքերում ապրող երեխաներին: Զրույցներից պարզ դարձավ, որ ուսուցիչներից շատերի աշխատավարձն անգամ 70 հազար ՀՀ դրամը չի գերազանցում, սակայն նրանք բարձր են պահում մանկավարժի մասնագիտության վարկանիշը և մեծ պատասխանատվությամբ վերաբերվում իրենց մասնագիտական պարտականությունների կատարմանը։ 

Եւ հիմա մեծ հարց է առաջանում ինչ անեն մարզերում ուսուցիչները, եթե Նիկոլ Փաշինյանի կառավարությունը նրանց ցածր աշխատավարձ է տալիս. չաշխատե՞ն, նշանակում է գյուղերում երեխաները անկիրթ պիտի մեծանան, աշխատե՞ն այդքան ցածր աշխատավարձով, նշանակում է, որ ընդունում են՝ իրենք լավ կրթություն չունեն, դրա համար ստանում են ցածր աշխատավարձ: 

Նիկոլ Փաշինյանն իր հայտարարությամբ թիրախավորել է կոնկրետ խավերի, ինչն անթուլտրելի է: Գյուղերում մարդիկ ստիպված են լինում շատ ավելի ցածր աշխատավարձով աշխատել, քանի որ այլընտրանք չունեն: 

Հ. Գ. Նիկոլ Փաշինյանը կրթության մասին խոսելիս պետք է սկսի սեփական թիմից ու շրջապատից: Պատգամավորներ ու պաշտոնյաներ կան, որ անգամ բարձրագույն կրթություն չունեն, բայց միլիոններ են վաստակում»,- գրել է Թովմասյանը: