«Այս ամենում հիմնականում ԱՄՆ–ն շահ ունի». Պատրուշև

ՌԴ Անվտանգության խորհրդի քարտուղար Նիկոլայ Պատրուշևը հայտարարել է, որ ԱՄՆ–ն «Հյուսիսային հոսքերում» տեղի ունեցած պայթյունների գլխավոր շահառուն է։ 

««Հյուսիսային հոսք 1» և «Հյուսիսային հոսք 2» գազատարներում տեղի ունեցած պայթյունների մասին հաղորդումների առաջին իսկ րոպեներից Արևմուտքը մեղավորներին փնտրելու ակտիվ արշավ սկսեց։ Բայց ակնհայտ է, որ այս ամենում հիմնականում ԱՄՆ–ն շահ ունի, նախևառաջ` տնտեսական»,– ասել է Պատրուշևը` Մոսկվայում ԱՊՀ երկրների հատուկ ծառայությունների ղեկավարների խորհրդակցության ժամանակ։

Վերջինիս խոսքով` 1983 թվականի հոկտեմբերին նման իրավիճակ արդեն իսկ եղել է Նիկարագուայի Պուերտո Սանդինո նավահանգստում։

«Պետք է համակարգված ջանքեր գործադրել բացահայտելու համար այս հանցագործության պատվիրատուներին և կատարողներին, ինչը մեր արդյունավետ փոխգործակցության լավ օրինակը կլինի», – նշել է ՌԴ Անվտանգության խորհրդի քարտուղարը:

Հիշեցնենք` սեպտեմբերի 26-ին ահաբեկչություն է տեղի ունեցել միանգամից երկու գազատարում։