Փելոսիի ասուլիսի ժամանակ գրանցված խնդիրներից հետո ԱԺ աշխատակազմի ղեկավարը նկատողություն է ստացել

ՀՀ ԱԺ նախագահ Ալեն Սիմոնյանի որոշմամբ՝ ԱԺ աշխատակազմի ղեկավար-գլխավոր քարտուղար Վահան Նարիբեկյանին նկատողություն է հայտարարվել:

«Ղեկավարվելով Հայաստանի Հանրապետության աշխատանքային օրենսգրքի 223-րդ հոդվածի 1-ին մասի 1-ին կետով, Ազգային ժողովի խորհրդի 2017 թվականի հունիսի 12-ի ԱԺԽՈ-006-Լ որոշման 1-ին հավելվածի 18-րդ կետի 1-ին ենթակետով՝ կարգադրում եմ.

1. Աշխատանքային պարտականությունները ոչ պատշաճ կատարելու համար Ազգային ժողովի աշխատակազմի ղեկավար-գլխավոր քարտուղար Վահան Նարիբեկյանի նկատմամբ կիրառել կարգապահական տույժ՝ նկատողություն»,-նշված է Սիմոնյանի որոշման մեջ:

Հիշեցնենք, որ  ԱԺ-ում ԱՄՆ Ներկայացուցիչների պալատի նախագահ Նենսի Փելոսիի ասուլիսի ժամանակ տեխնիկական խնդիրներ էին գրանցվել և թարգմանությունը պատշաճ չէր իրականացվել, իսկ ԱԺ աշխատակազմի ղեկավար-գլխավոր քարտուղարն այդ ընթացքում գտնվում էր պաշտոնյաների համար նախատեսված հարթակում։